Iran Ta Sha Alwashin Murƙushe Masu Tallata Manufar Cire Hijabi

A ranar Asabar 15 ga watan Afrilun da ya gabata ne mataimakin babban lauyan ƙasar Iran ya bayyana cewa, za a gurfanar da mutanen da ke ƙarfafa mata gwiwar cire hijabi a gaban kotunan laifuka, kuma ba za su sami damar daukaka ƙara kan duk wani hukunci da aka yanke musu ba.

Kalaman nasa na zuwa ne a daidai lokacin da ake samun ƙaruwar mata da ke bijirewa dokokin sanya hijabi da Iran ta sanya, inda suke bayyana a manyan kantuna da gidajen cin abinci da shaguna da sauran wuraren taruwar jama'a.

 A cikin 'yan watannin nan wasu mata masu fafutuka sun fito fili sun yaɗa hotunan kansu a shafukan sada zumunta ba tare da lullubi ba.

Jami'an tsaron 'yan sandan Iran a ranar Asabar ɗin makon jiya, sun sanya na'urorin ɗaukar hoto a wuraren taruwar jama'a don tantancewa da kuma hukunta matan da aka gano ba su sanye da hijabi, kamar yadda kafafen yaɗa labarai na Iran suka ruwaito.  

Kamfanin dillancin kabaran Reuters ya ruwaito mataimakin babban lauyan gwamnatin ƙasar, Ali Jamadi na cewa, "Duk wadda aka sama da wannan laifin take za a gurfanar da ita a gaban kotun hukunta laifuka masu alaƙa, kuma duk hukuncin da aka yanke shi ne na ƙarshe ba za a iya daukaka ƙara ba".

 Ya ƙara da cewa gwamnatin ƙasar ta yi tanadin hukunci mai tsanani ga waɗanda ke tallata manufar cire hijabi fiye da laifin cire hijabin kansa, domin yana ɗaya daga cikin bayyanannun misalai na ƙarfafa fasadi" in ji shi.

Ƙasar Iran dai na shan suka daga ƙasashen yamma da ke yi ma tsarin al'adun addini da ta runguma kallon masu tsauri kuma waɗanda duniya ta soma barin yayinsu.

Zubairu Ahmad Bashir (Kasarawa)

Ɗan jarida ne a Rediyon Tarayyar Najeriya (FRCN)

bashir.radionigeria@gmail.com